الواحد فرد مايقبل التقسيم
بس انه انقسم وبدونك اتعدد
اتقسم بدونك وانجمع وياك
لان كلي ويه كلك بيك يتوحد
جنت جاهل واجيك اتشرد من الناس
هسه تعلمت من نفسي اتشرد
عشكتك ذره ذره وصرت اغار اعليك
اذامحد يبوسك اذبح المحد
ولك لاتنطرح يم ناس تعبانين
مو طولك حصارشلون تتمدد
وشعرك ليله ضلمه اتوحشت عالريح
كل ما هب عليها اتلفلفه ابسود
مو حقه الكفر وشافك اتعبد
وفراشه نور اذنك والزلف خطار
مرة يحط عليها ومرة يتبعد
وجفنينك سما ومجفي اعله رمشك ليل
اذا ترمش يظل فرقد يطك فرقد
يل عينك بحيرة كل هدوء الليل
ودموعك نوارس لو مشت عالخد
وعله اخدودك صور منقوشه من بوسات
اباوع عالصور ما بايسك احد
وشفتينك شمس من تبتسم نصين
يقطعها البرق وبنصها يتجمد
وحنجك صدر بجعه انصاغت من النور
اذا ماتت شمس من نورك اتولد
ومثل زمزم ركبتك نص ذهب نص جام
وعين الماي هاي ال عالصدر تركد
ونام اباب صدرك واذنب وانخاك
كبتين الذهب ما تشفع لاحد
يبو ايد الثلج لا تطلع بتموز
مو خاف الثلج خاف الحلك تبرد
واذا لا مو ثلج كل ها لبياض منين
معقول العظم فوك الجلد يصعد
يل جتفك منارة بيا شرع يا دين
اموت من العطش وكبالك اتشهد
وحدر جتفك فرات ودجله ملتقيات
وشفت شط العرب جوة الجتف ممتد
واباوع عالبطن مو ركبة الدلفين
لان عين الحياة بصرتك تركد
يبو تاج الكطن لين افتحتك باب
مو خاف الكطن بالعين يتفرهد
خطواتك حضارة وخصرك التاريخ
اذا تمشي العرب فوك الفرس تصعد
وعلي كل ما تمر يجبرني حسن البيك
واصفنك لجن من وصفك اتردد
اذا الك ما وصفتك واعتذر يهواي
وصفت الخيال المنك اتولد
(((مجنون في حب الوطن)))
