من سجن لسجن
ثق لو بالعراق يصير طوفان
ونبي الله نوح يرد علينه
يباوع بالبشر مايلگه انسان
ويصعد وحده و تمشي السفينه
من سجن لسجن جبت العمر ياعراق
و عليك بكل وكت متسلطه كفارك
لسواد عيون شعبك ماأجاك انسان
اجت كلها لسواد عيون أابارك
ماباسوك أخوتك و أنت خد الگاع
ودمعتي على طولك يجرن أنهارك
بسك يا وطن لا تشعل الهم نار
غموك العرب و اتدفو بنارك
ذلتنه الدول ردينه مكسورين
بس أنت الغريب مدلل بدارك
مثل حاتم جنت تذبح فرس للضيف
بس شعرة فرس مايسوه خطارك
يجدي الماي شعبك و أنت ذو النهرين
يجدي الماي زرعك و أنت ذو النهرين
خلصت العمر تسگي بزرع جارك
زرع جارك كبر مامد عليك فياي
بس مد أرضته و عرها أسوارك ....
مو أمريكه ثارك لا ولا صدام
بس كون من العرب ناخذلك بثارك
لا تزعل علي من حقي لو مليت
منو بگدي أحتمل و بضلعه بسمارك
منو الجرحه على طوله
و انت دربك سيف
ومتاعك ملح ويكمله مشوارك
برداً غطته و ضل خايف ابراهيم
و أنا بطرگ الجلد و أتحملت نارك
گادوني بحبل وعيوني معصوبات
ماطلعو حرف من خزنه اسرارك
بعد شكثر بعد
مو انا الاول ذاك
داراني الوكت و انت الوكت دارك
من جف اليسلم خدي ظل يخاف
من گد ما بجه من جفوف سطارك
وانا بياوكت يسطرني هذا و ذاك
گبل ويا الهوى من يطگني أتعارك
و عذرتك يا وطن لان انا طيب ذات
لو غيري ولله ما يقبل اعذارك
لو اشرف شعب بالدنيه عايش بيك
جان جمله بمزاد انباعت ديارك
بس احنه جم مره طكنه الجوع
و بعنه هدومنه و ما بعنه زنجارك
و غيرك يا وطن لو ألنه حق نختار
نعوف الدنيه كلها و نرد نختاارك
للشاعر نائل مظفر
