الصديق
موكلمن فتحلك بابه يهواك
ولا كلمن يكرهك بابه ينسد
اكو مسدود بابه وكلبه مفتوح
وكو مفتوح بابه أو كلبه اسود
اذا طشيت صحبانك على الماي
اثكلهم وفه جواك يركد
واخففهم يضل طافح على الروج
يروح ويه الجزر ويرجعه المد
اذا محتار سافر تعرف الناس
منو ايزت القطار او يوكف ازيد
اكو اتشده ابحبل ويكطعه ويروح
واكو بكلمه شرف علسجه ينشد
واكو بمشيه قطارك عينه تحتار
اوبالحظه الأخيره اوياك يصعد
واكو ايشيل المحطه ويه القطار
ويدكهه على كلبه اوصدره ينسد
فرق بين اليعبدك بل محطات
او فرق بين البناك ابكلبه معبد
لاتامن بشر من طينه مخلوق
بس 14 طيـــــــــنه محمد
موكلمن ضحكلك منه ترتاح
تره ناب الضبع كل ضحكه ينحد
ولا تحقد على كلمن يبجيك
اذا دمعك طفح صدكني تبرد
البشر دله اويفور ابدخاله الضيم
وذا يطفح دمع نيرانه تخمد
ولا تحقد على الصعدوا بلااجناح
معروف الصكر لوجنحه ينشد
او موكلمن نزل يسمى مذل
ولولا كلمن صعد يسمى امجد
اكو صاعد رغم ماهو عالكاع
وكو نازل يضل لوقمه يصعد
راسك منتصب اعلى من الدين
بس من السهل تتناوشه اليد
وذا عندك جبل خلهم يصعدون
فرق بين الصعد وراد يصعد
اكو ايهده الجبل لو هد الجفوف
واكو ايهد الجبل لو جفه ينهد
اوعله المبرد كفر تنغر الاسيوف
لان سيف اعلى سيف بكلبه ينحد
وذا عنهم رحل كلهم يخسرون
شنو نفع السيوف ابليه مبرد
ومايرحل جذب موخاف يعمون
ويضل السيف تالي ابكصبه ينصد
وذا تعزف لحن ويذمك انسان
لاتكطع كمانك صعبه ينشد
مرات اللحن ما يطرب انسان
او مرات البشر ذاناته تنسد
او مرات الحن يطربه طرشان
بس طبع اليسمعك زور يشهد
على البلبل يكلك منكر الصوت
وذا ينهك حماره ايصيح غرد
وذا حجيك حكم وتخاطب الناس
كل راس على كده وياك ينشد
لان روس البشر عكس الفراغات
كل ماتنترس تستوعب ازيّد
وذا تحجي اويرد صوتك كما كان
يعني اليستمع فارغ مجرد
صوتك مايرده الراسه متروس
لان بس بالفراغ الصوت يرتد
وذا ضيمك كبر لاتحجي بالعين
اوتشوف الدنيه كله ابلون اسود
منو بهذا الوكت ماغيّره الضيم
حتى ابيوم الأحد ماكو احد
لكن لا تضل تحسب توابيت
انى كبلك علي صب اسود العد
ارفعت راسي اوكمت احسب بالعراس
على خشمي سواد الأبيض امتد
ولو غثني الطفل من شفته بالعيد
يشد بجروح ثوبه اودمعه عل الخد
بس اني افرحت جي جبته الطفل
ومسح كل الدموع اوراح عيد
علمنه الطفل نصبر على الضيم
او طلع منه الطفل ايمانه ازيد
اريد اطرح قضيه وانتم اسلام
واريد اسأل جمعكم واطلب الرد
بنيتوا اشكد معابد كلهه عالكاع
منو البيكم بناله ابكلبه معبد
ماكولن كفر لوقلة ايمان
لكن مهزله او ما ألهه احد
لتلاثه الملاهي امفتحه بليل
او بالعشره الجوامع كله تنسد
للشاعر نائل المظفر
